ንሕጊ ፍራህ፡ ሰብ ኣይትፍራህ !

ዝኸበርክንን ዝኸበርኩምን ኤርትራውያን ኣሕዋትን ኣሓትን፣
ንነዊሕ እዋን ክንጽበዮ ዝጸናሕና፣ ናይ ለውጥን ናይ መጻኢ ራእይን ሒዝና፣ ኣብዚ ቀረባ ግዜ ኣብ ቅድሜኹም ክንቀርብ ኢና!
ንሕና መን ኢና ?
"ሓምላይ ሰልፊ ኤርትራ"
እዚ ሰልፊ እዚ፣ ንልዕልና ሕጊ፣ ንማሕበራዊ ፍትሒ፣ ንመሰረታዊ ደሞክራሲን ንከባቢኣዊ ውሕስነትን መሪሕ ዕላማኡ ዝገበረ ሓዱሽ ሓይሊ እዩ። ፍርሓት የብቅዕ፣ ባርነት የብቅዕ! ሰብ ናጻ ኮይኑ፣ ሃገር ብሕጊ ጥራይ እትመሓደረሉ እዋን ክበጽሕ፡ምሉእ መደብ ዕዮና፣ መሪሕነትናን ናይ ምስረታ ኣዋጅናን ሒዝና ኣብዚ ቀረባ መዓልታት ብወግዒ ክንመጽእ ኢና።
* ቃልስና ናይ ሰላም እዩ!
* ቃልስና ናይ ፍትሒ እዩ!
* ቃልስና ናይ ሓምላይ መጻኢ እዩ!

"ሓምላይ ሰልፊ" ማለት እንታይ ማለት እዩ?

ሓምላይ ሰልፊ (Green Party) ክበሃል ከሎ፣ ተፈጥሮን ከባቢን ጥራይ ምሕላው ማለት ኣይኮነን። ንሱ ሓደ ክፋሉ ኮይኑ፣ እቲ ዓቢይ ትርጉሙ ግን "ሓምላይን ጥዑይን ህይወት ንደቂ ሰባት" ምፍጣር እዩ። ብሓጺሩ ኣብዞም 4 ዓንድታት ዝተመርኮሰ እዩ፦

1. ማሕበራዊ ፍትሕን ማዕርነትን (Social Justice):

ከምቲ ተፈጥሮ ንኹሉ ሰብ ማዕረ ጸሓይን ኣየርን እትህብ፣ ሓምላይ ሰልፊ እውን ኩሉ ኤርትራዊ (ብዘይ ኣፈላላይ ጾታ፣ ዓሌት፣ ሃይማኖት ወይ ዞባ) ማዕረ ዕድል፣ ማዕረ ፍትሒ፣ ጥዕናን ትምህርትን ክረክብ ይቃለስ።

2. መሰረታዊ ደሞክራሲ (Grassroots Democracy):

ስልጣን ናይ ህዝቢ እዩ። ውሳነታት ካብ ላዕሊ ናብ ታሕታይ ዝወርድ ዘይኮነስ፣ ካብቲ ተራ ህዝቢ (ካብ ታሕቲ) ናብ ላዕሊ ዝድይብሉ፣ ህዝቢ ባዕሉ ዕድሉ ዝውስነሉ ስርዓት ምፍጣር ማለት እዩ።

3. ሰላምን ዘይ-ጎነጽን (Non-violence & Peace):

ኩሉ ጸገማትናን ኣፈላላያትናን ብዘተ፣ ብሕግን ብሰላማዊ መገድን ጥራይ ምፍታሕ። ምስ ጎረባብትናን ምስ ዓለምን ዘለና ርክብ እውን ኣብ ናይ ሓባር ክብርን ሰላምን ዝተመርኮሰ ምግባር።

4. ኣከባቢኣዊ ውሕስነትን ቀጻልነትን (Ecological Sustainability):

ንሃገርና ኤርትራ ዳግማይ ምልምላም፣ ኣእዋም ምትካል፣ ሕርሻና ዘመናዊ ምግባርን ካብ ብከላ ነጻ ዝኾነ ጸዓት (ጸሓይን ንፋስን) ምጥቃም። እዚ ማለት ሎሚ ጥራይ ዘይኮነስ፣ ንመጻኢ ወለዶታት እትበቅዕ ሃገር ምስራሕ ማለት እዩ።
 

ባህሊ ኤርትራውያን ሓምላይ እዩ። ኣብ ባህልና "ሓምላይ" ማለት ልምዓት፣ ጥሪት፣ በረኸትን ሰላምን ማለት እዩ። ስለዚ "ሓምላይ ሰልፊ ኤርትራ" ማለት፣ ንባህላዊ ክብርታትና ምስ ዘመናዊ ናይ ፍትሕን ደሞክራሲን ስነ-ሓሳብ ኣወሃሂዱ፣ ንኤርትራ ሓዳስን እትልምልምን ሃገር የማዕብል ማለት እዩ።

ሕጊ ፍራህ ፡ ሰብ ኣይትፍራህ !!!

ሓምላይ ሰልፊ ኤርትራ !!!

14 ሓምለ  2026